Датум на објава: 12.04.2021
Во изминатиот период интензивно даваме примери од земјите од регионот, каде што интензивно се вложува во изградба и подобрување на велосипедската инфраструктура, како и реализација на проекти за изгрдба на регионални велосипедски патеки. Секогаш кај нас оправданието гласи „ние сме Македонија“, со понижување и деградирање на државата, како и самооправдување колку Македонија е сиромашна држава.
Нашиот денешен пример, не е ниту од Германија, ниту од Швајцарија, денешниот пример е од соседна Србија.
Кон крајот на 2020 година, во Србија заврши комплетната изградба на меѓуграничната велосипедска патека од Зрењанин (Србија) до Темишвар (Романија). Вкупната должина на патеката изнесува 75 километри, и поврзува 12 населени места. Патеката има големо значење, со тоа што населените места имаат мало растојание, и честата миграција на граѓаните од место до место е многу побрзо, поефективно и поисплатливо.
Според очекувањата, по оваа патека се очекува да поминат околу 8000 луѓе во текот на една година. Овој податок е многу значаен и за помалите населени места низ кои минува патеката, сметајќи дека барем 5-10% од велосипедистите ќе застанат во некоја локална продавница, некое локално кафуле, со што и приливот во овие мали села ќе се зголеми.
Дополнителна корист од патеката ќе имаат и велосипедистите рекреативци, кои во се поголем број возат по оваа патека, привлечени од фактот што возат во друга држава. Покрај сето тоа, патеката нуди и прекрасни пејзажи низ полињата во областа Банат, па ќе биде привлечна и за фотографите кои би чекале изгрејсонце или зајдисонце токму по оваа патека.
Во продолжение погледнете го растојанието помеѓу населените места и самите проценете дали ваквите патеки може да бидат корисни во Македонија
|