Travelers Cycling

Кога ќе се спомене Bugatti, првата асоцијација се хиперавтомобили со неверојатни перформанси и астрономски цени. Но, легендарниот француски бренд сега го проширува своето портфолио со нешто сосема поинакво – премиум друмски велосипед наречен Bugatti Factor One.

Развиен во соработка со британскиот производител Factor Bikes, новиот модел претставува спој на врвен дизајн, најсовремена технологија и препознатливата Bugatti естетика.

Иако висококвалитетните карбонски велосипеди често достигнуваат цена од неколку илјади евра, Bugatti Factor One оди чекор понатаму. Почетната цена изнесува 25.799 евра, што е повеќе од цената на многу нови автомобили од компактната класа.

Велосипедот ќе биде произведен во само 250 примероци, што дополнително ја нагласува неговата ексклузивност.

Како и автомобилите на Bugatti, и Factor One е изработен од врвни материјали. Рамката е целосно направена од јаглеродни (карбонски) влакна и е аеродинамички обликувана за да го намали отпорот на воздухот и да обезбеди максимална ефикасност при возење.

Дизајнот останува верен на препознатливиот стил на Bugatti, со впечатлива двобојна комбинација и карактеристичната Bugatti сина боја, додека долж рамката се протега голем бел натпис со логото на брендот.

Иако е најпристапниот производ што го носи името Bugatti, Factor One воедно е и најбавниот. Сепак, неговата цел не е да соборува брзински рекорди, туку да понуди уникатно искуство и ексклузивност за љубителите на луксузот и велосипедизмот.