Travelers Cycling

Вовед

Ако барате смирен и живописен дневен излет на две тркала, возењето до Беровското Езеро е совршена дестинација. Се работи за рекреативна велосипедска тура која ве носи низ мирна природа, густо борoво и буково зеленило, со блага елевација и прекрасни погледи на езерото, реката Брегалница и околните ридови.

Локација и природен амбиент

Беровското Езеро, исто познато и како Ратевско Езеро, е вештачко езеро сместено на околу 7 км од градчето Берово.
Околу него владее тивка и недопрена природа: борова и букова шума, мирис на шумска природа, и мирни области што ги издвојуваат велосипедистите од гужвата и урбаниот метеж.

Рутата: од Берово до езерото

Патот започнува од градот Берово, на околу 850 м надморска висина. Патеката има должина приближно од 6,5 км и може да ја возите до крајот на езероро со што должината би достигнала околу 10 км. Возејќи ќе минете покрај викенд-населбата Абланица и долината на реката Брегалница.

По навршувањето на 3-4 километри од почетокот, ќе почувствувате како теренот полека почнува да се издигнува, додека шумата наоколу почнува да се згуснува и почнува да ве обвиткува со борови и букови дрвја. Максималната висинска точка е околу 1.050 мнв, што ви дава одличен поглед кон околината.

Крајната дестинација на овој дел од рутата е самото Беровско Езеро, на околу 1.000 м. Покрај кое има рекреативна пешачко велосипедска патека.

Враќање: преку Црвен Брег и Абланица

За да ја доживеете Малешевијата во вистинско светло, предлагаме за враќање да го изберете кракот низ туристичката населба Абланица и месноста викана Црвен Брег.
Од населбата Абланица ви се отвараат нови можности за авантура, односно постои offroad патека до „Равна Река“ и Пехчевските водопади, преку кои може да се стигне до врвот Ченгино Кале и граничниот премин Клепало.

Но ние би се задржале само за рекреативните рути кои цело време се обложени со асфалт.
Враќањето преку Абланица прави прекрасен природен круг, со различен пејзаж и атмосфера – додека на едниот дел доминира шумата, на повратокот може да почувствувате поголем мир преку и отворените погледи кон ридовите и кон планинските врвови.

Тежина и погодност

Оваа рута може да се опише како „лесно-умерена“ — и не претставува претешка планинска тура, иако има доволно висинска разлика и делови со искачување, така што е погодна за рекреативни велосипедисти со основна физичка подготвеност. Поради благото искачување и фреквенцијата на сообраќај, турата не ја препорачуваме да ја возат деца под 10 години.

Има и делови со спуштање, особено на делот на враќање, што го прави возењето динамично и шаренолико.

Безбедност и инфраструктура

• Целосната тура се вози по асфалт низ мирен предел без многу сообраќај, освен рекреативната патека покрај езерото која е уредена со камења. Тоа значи дека велосипедистите може да уживаат во помирна и побезбедна возачка средина, особено во работните денови кога има помал број на автомобили.
• За поголемите авантуристи, има многу дополнителни опции на offroad патеки, но за тоа би објасниле во друга објава
• Во план за реализација се изградна на нови велосипедски патеки, на делот од Абланица до Беровско Езеро, како и патека околу езерото

Природни и културни вредности

• Велосипедската тура не е само за физичко движење — вклучува природни убавини како шумите, реката Брегалница и самото езеро, но и историско-културни делови
• Со рутата минувате покрај три значајни манастири:
  - Св Архангел Михаил кој се наоѓа во градот Берово
  - Успение на Пресвета Богородица кој се наоѓа на 2 км од почетокот на турата
  - Св Гаврил Светогорец кој ќе го поминете доколу возите преку Црвен брег. Манастирски комплекс кој сеуште е во изградба
• При паузите може да се ужива во мирот и природното богатство, што ја прави турата и одмор, не само спорт.

Практични совети

1. Опрема: Препорачливо е да користите MTB или хибриден велосипед со добри сопирачки, бидејќи ќе има делови со искачување и спуштање.
2. Напојување: Земи доволно вода и храна — на патот има природни точки за пауза, но можете да сметате и на неколкуте ресторани / хотели покрај Беровското Езеро.
3. Безбедност: Користете кацига. Иако дел од патот може да има мала фреквенција на автомобили, условите се планински и спуштачките делови можат да бидат доста брзи.
4. Препораки: Препорачливо е да имате GPS, мапа или GPX трака — ова ќе ви помогне, особено на делот за враќање преку Црвен Брег и Абланица.
5. Сезона: Најдобро е да возите во пролет, лето или рана есен, кога температурата е пријатна.

За крај

Ова велосипедско патување од Берово до Беровското Езеро и назад низ Абланица и Црвен Брег е вистинско малешевско уживање на две тркала — спој на спорт, природа и тишина. За оние што сакаат активно да уживаат без големи туристички гужви, ова е идеална рута. Ако планирате викенд-патување или еднодневен излет, ова ви дава можност да се поврзете со природата, да го почувствувате ритамот на кревката шумска тишина и да создадете убави спомени на планинско езеро.